السلام عليكم ورحمة الله وبركاته..
عندي مشكلة وحابة إني آخد رأيكن فيها إذا بتسمحو..
القصة وباختصار...
من سنتين تقريبا بإجارة الصيف كنت بلبنان مع أهلي.. فإجا لعنا مرة ابن عمتي واسمو محمد..
كانت أول مرة بشوفو فيها من حوالي أكتر من 4 سنين..
المهم بهاي الزيارة كان كلامنا رسمي كتير لأنو ما كنا ماخدين على بعض..
المرة التانية لما إجا لعنا قبل ميروح طلب إيميلي وسألني عن الأوقات اللي بكون فيها عادة أون لاين
فعطيتو اياه على أساس إني بنت خالو وهو ابن عمتي
مش أكتر ولا أقل...
وقبل مأرجع عالإمارات وبالتحديد باليوم اللي سافرت فيه
إجا محمد لعندي وقال لي : بحبك
طبعا هاي الكلمة كانت صدمة كبيرة بالنسبة إلي وشي ماكنت بتوقعو أبدا..
مع العلم أنو هو أصغر مني بسنة..
المهم أنا ما عطينو جواب أصلا أنا من الصدمة ما كنت عارفة أحكي ولا كلمة..
تركتو ورحت..
وبعد تقريبا ساعة سافرت..
كنت كتير أشوفو عالنت وكنا نحكي بهاد الموضوع..سألني عن رأيي
قلتلو إنت بالنسبة إلي أخ وابن عمة بس مش أكتر ولا أقل..
كان رافض هاد الموضوع وكان يحاول بكل الطرق إنو يقنعني بحبو
بس أنا كان من المستحيل إني أحبو لأنو كان بنظري صغير بس هو كان يقلي الحب ما بيعرف عمر
وإذا انت مدايقك العمر عشان رح يأخر ارتباطنا أنا مستعد أترك المدرسة وأشتغل...
بس أنا طبعا ما قبلت..لأني لو كنت بحبو أو مستعدة إني أحبو كنت رح أستناه مهما طال الزمن..
بس هو كان مصر كتير وأنا ما قدرت أقنعو بوجهة نظري..
المهم..
مرة من المرات قعد أخوي عالنت من بعدي وقرأ المحادثة اللي كانت بيناتنا
أنا بهديك الفترة كانت علاقتي قوية كتير بأخوي لدرجة إني كنت معطيتو الباس وورد تبع إيميلي
فصار يفتحو من وراي ويحكي مع محمد كلام على لساني..
الكلام كلو كان مصخرة واستهزاء وإني عمبتسلا بالحكي معاه...وهيك أشياء...
يعني الكلام كان كتير جارح
وأنا ما عرفت بهالشي غير بعد فترة ما شفت فيها محمد ولا مرة..
عرفت هالشي من أخوي..وبعدا ما قدرت أعمل شي لأنو
صار يمنعني من فتح الايميل
وبس
من وقتا لهلأ ما حكيت مع محمد ولا مرة وما بعرف إذا كان لسا عنفس الايميل ولا لأ
بس شفتو بالصيف الماضي وما تعدا كلامنا السلام...وأصلا ما كان في فرصة إننا نحكي مع بعض بهاد الموضوع
أنا حاسة إنو زعلان مني بسبب الحكي اللي كان يحكي أخوي
لأنو فاهم إني أنا اللي حكيتو
وأنا مش عارفة شو أعمل حابة كتير أشيل سوء التفاهم اللي بيناتنا وبنفس الوقت ما بدي
يرجع يحبني وما بدي يفكر إني بدي اياه يحبني
أنا آسفة بعرف إني طولت عليكن بس بتمنى اني ألاقي
منكن النصيحة بخصوص هاد الموضوع
برأيكن أحاول أصالحو وأفهمو باللي صار لأني مش قادرة أتحمل إحساس
إنو شخص يكون زعلان مني وأنا ماإلي ذنب بالموضوع..
ولا أتركو للزمن وأكيد رح ييجي يوم ويحب وحدة تانية تنسيه
بنت خالو اللي رح تضل بنظرو إنسانة شريرة...!!!
هبوووش انتي هيك كل قصصك 
